«སངས་རྒྱས»ཞེས་པའི་བོད་བསྒྱུར་མུ་འབྲེལ་བརྙན་འཕྲིན་ཟློས་གར་ལ་མཇལ་རྗེས།

p2467456883.jpg

           བདག་ཅག་གི་སྟོན་པ་སྐུ་འཁྲུངས་ས་རྒྱ་གར་ཡིན་ནའང་ཁོང་གི་སྐུ་གསུང་ཐུགས་ཀྱི་བྱིན་རླབས་ཆ་ཚང་བ་ང་ཚོ་བོད་མི་རིགས་ཀྱི་བགོ་སྐལ་དུ་ཤར་བ་རེད། འཇིག་རྟེན་འདིར་རྒྱ་ཆེ་ཆུང་ལ་མ་ལྟོས་པར་ཆོས་ལུགས་མི་འདྲ་བ་ཧ་ཅང་མང་པོ་ཡོད་པར་མ་ཟད། དེ་མཚུངས་ཀྱི་སྟོན་པ་ཡང་ཧ་ཅང་མང་པོ་ཡོད།

        དེ་ལྟར་ཡང་ང་ཚོ་ནང་པ་སངས་རྒྱས་པའི་སྟོན་པ་ནི་ཆེས་མཆོག་ཏུ་གྱུར་པའི་སྟོན་པ་ཞིག་རེད། དེ་ཡང་རྒྱུ་མཚན་མེད་པ་དང་། ཕྱོགས་ཞེན། རྨོངས་དད་རྐྱང་པའི་ཐོག་ནས་བཤད་པ་ཞིག་རྩ་བ་ནས་མིན། ངས་འདིར་བདག་ཅག་གི་སྟོན་པའི་ཐུན་མོང་སྣང་ངོའི་རྣམ་ཐར་གྱི་ཆ་ཤས་འགའ་ཞིག་བརྗོད་ནས་བདག་ཅག་གི་སྟོན་པ་གང་ཉིད་སྟོན་པ་གཞན་གང་ལས་ཀྱང་ཁྱད་པར་དུ་འཕགས་པ་ཞིག་ཡིན་པ་སྟོན་ཐབས་བྱེད་ཀྱི་ཡིན།

       གཅིག ནང་པ་སངས་རྒྱས་པའི་སྟོན་པ་ནི་ཆོས་ལུགས་གཞན་པ་ཚོའི་སྟོན་པ་ལྟར་མི་མངོན་པའི་དབྱིངས་ཤིག་ནས་དཀོན་མཆོག་གཞན་པ་ཞིག་གིས་ཁོང་གི་སྐུ་ཚབ་ཏུ་མངགས་པའི་ཕོ་ཉ་ལྟ་བུ་ཞིག་མ་ཡིན་པར། ཁོང་སྐུ་དངོས་སུ་འཇིག་རྟེན་འདིར་ཕེབས་ནས་སྐུ་ཚེ་ཧྲིལ་པོ་གཞན་དོན་དུ་བཏང་བའི་སྐྱེས་བུ་དམ་པ་ཞིག་རེད།

         གཉིས། ཁོང་གིས་སྐབས་དེའི་རྒྱ་གར་གྱི་རིགས་རུས་མཐོ་དམན་དང་། ཕོ་མཆོག་མོ་དམན། དབུལ་ཕྱུག་གི་དབྱེ་འབྱེད་ཀྱི་ལམ་ལུགས་སོགས་ལ་དགག་པ་ཤུགས་ཆེར་གནང་ཡོད་པར་མ་ཟད། དངོས་སུ་རྒྱ་གར་གྱི་ས་གནས་འདྲ་མིན་ནས་རིགས་རུས་ཧ་ཅང་དམན་པའི་ཕོ་མོ་མང་པོ་བསྡུ་རུབ་ཀྱིས་ཁོང་ཚོར་རིགས་རུས་མཐོན་པོ་ཚོ་ལྟར་ནང་ཆོས་སློབ་སྦྱོང་དང་ཉམས་ལེན་བྱེད་པའི་གོ་སྐབས་གཅིག་མཚུངས་སུ་ཕུལ་བ་དེས་འགྲོ་བ་མིའི་རིགས་ཧྲིལ་པོར་མིག་དཔེ་བཟང་པོ་བཞག་ཡོད།

p2411217339.jpg

         གསུམ། འགྲོ་བ་མིའི་རིགས་ཙམ་མ་ཡིན་པར་ཐ་ན་སེམས་ཅན་འབུ་སྲིན་ཚུན་ཆད་བདེ་བ་འདོད་པ་དང་སྡུག་བསྔལ་མི་འདོད་པ་ཡིན་པ་གཅིག་མཚུངས་སུ་གཟིགས་ནས། སེམས་ཅན་སུ་གཅིག་ལའང་འཚེ་བ་བྱེད་མི་རུང་བའི་འཚེ་བ་མེད་པའི་ལྟ་སྤྱོད་ཤུགས་ཆེར་དར་སྤེལ་བྱས་པ་དེས། སྐབས་དེའི་རྒྱ་གར་ཙམ་མ་ཡིན་པར་ཨེ་ཤེ་ཡ་དང་། འཛམ་གླིང་ཧྲིལ་པོའི་སེམས་ཅན་དཔག་ཏུ་མེད་པར་ཕན་བདེ་བླ་ན་མེད་པ་བྱིན་དང་སྦྱིན་བཞིན་ཡོད།

         བཞི། གང་ཉིད་གོ་ལ་འདིའི་གཙུག་རྒྱན་དམ་པར་སྐུ་འཚོ་བཞུགས་སྐབས་རྒྱ་གར་དུ་ལྟ་སྤྱོད་མི་མཐུན་པའི་ཆོས་ལུགས་དང་གྲུབ་མཐའ་མི་འདྲ་བ་ཧ་ཅང་མང་པོ་ཡོད་པར་མ་ཟད། དུས་ནས་དུས་སུ་ཆོས་ལུགས་དང་གྲུབ་མཐའ་ཁག་གི་བར་འཁྲུག་རྩོད་ཀྱི་གནས་ཚུལ་མི་ལེགས་པ་ཡང་ཡང་འབྱུང་གི་ཡོད། གནས་སྟངས་དེའི་འོག་ཁོང་གིས་ཆོས་ལུགས་གྲུབ་མཐའ་ཁག་མཐུན་སྒྲིལ་དམ་ཟབ་ཡོང་ཆེད་རྩོད་པ་ཆོས་ཕྱོགས་སུ་ཞུ་ཐབས་དང་། ལྷག་པར་དུ་སེམས་ཅན་རྣམས་ཁམས་དང་མོས་པ་སྣ་ཚོགས་པས་གྲུབ་པ་ཤ་སྟག་ཡིན་སྟབས། དེ་མཚུངས་ཀྱི་ཆོས་ལུགས་དང་གྲུབ་མཐའ་མི་འདྲ་བ་སྣ་ཚོགས་ཤིག་དགོས་པར་གཟིགས་ནས། ཆོས་ལུགས་དང་གྲུབ་མཐའ་ཕན་ཚུན་བར་གཅིག་གིས་གཅིག་ལ་གུས་བརྩི་དགོས་པའི་ལམ་སྟོན་ཤུགས་ཆེས་གནང་ཡོད།

        ལྔ། གང་ཉིད་ཀྱིས་རྒྱུན་དུ། ང་ཁྱེད་ཅག་གི་སྟོན་པ་ཡིན་པ་རྒྱུ་མཚན་དུ་བྱས་ནས་ངའི་གསུང་བརྩི་མི་དགོས་པར། ངས་གསུངས་པའི་ཆོས་ཚུལ་ཕྲ་ཞིང་ཕྲ་བར་བསྲེགས་བཅད་བརྡར་བའི་གསེར་བཞིན་དུ་བརྟག་དཔྱད་ཡང་དག་པ་བྱས་ནས་ངེས་པ་རྙེད་པ་བྱུང་ཚེ། གཞི་ནས་ཁས་བླངས་ཆོག་པའི་ལམ་སྟོན་མཛད་ཀྱི་ཡོད་པ་མ་གཏོགས། ང་ཁྱེད་ཅག་གི་སྟོན་པ་ཡིན་སྟབས། ངའི་གསུང་ངེས་པར་དུ་བརྩི་དགོས་ཞེས་བཙན་བཀའ་ལྟ་བུ་ནམ་ཡང་བཏང་མྱོང་མེད།

        དྲུག ངའི་ཆོས་ལུགས་ནི་ཟློས་གར་འཁྲབ་པ་ལྟར་ཕྱིའི་རྣམ་འགྱུར་ཙམ་གྱིས་བྱེད་རྒྱུ་ཞིག་རྩ་བ་ནས་མིན་པར། ངས་ལམ་སྟོན་མཛད་པ་དག་ལ་ངེས་པ་རྙེད་ཚེ། དེ་ལྟར་རང་རང་གི་སེམས་རྒྱུད་ལ་སྦྱར་ཏེ་རང་ཉིད་ཀྱིས་རང་ཉིད་ངན་འགྲོའི་འཇིགས་པ་ཐམས་ཅད་ལས་ཐར་ཐབས་བྱེད་དགོས་པ་མ་གཏོགས། ཁྱེད་ཅག་གིས་ཆོས་ཉམས་ལེན་གང་ཡང་མ་བྱས་བཞིན་དུ་ངར་ཁྱེད་ཅག་ཐར་པའི་ས་ལ་འཁྲིད་ཐུབ་པའི་ནུས་པ་གང་ཡང་མེད་པར་གསུངས་ཡོད།

p2541178349.jpg

            བདུན། ལྷག་པར་དུ་འགྲོ་བ་རྣམས་ཀྱི་སྡུག་བསྔལ་ཆུ་ཡིས་དག་པར་བྱེད་པ་དང་། ཕྱག་དབང་བཞག་ནས་སེལ་མི་ནུས་པར་མ་ཟད། གང་ཟག་གཞན་རྒྱུད་ཀྱི་རྟོགས་པ་རང་རྒྱུད་ལ་འཕོ་བ་སོགས་ཀྱང་ནམ་ཡང་མི་སྲིད་སྟབས། རང་ཉིད་སྡུག་བསྔལ་ཐམས་ཅད་ལས་ཐར་མིན་དེ་གཙོ་བོ་སོ་སོ་རང་ཉིད་འབའ་ཞིག་ལ་རག་ལས་པ་ཞིག་རེད་གསུང་མཁན་གྱི་སྟོན་པ་ཐོག་མ་དེ་ཡིན། དེར་བརྟེན་གང་ཉིད་ཀྱིས་སྐུ་ཚེ་ཧྲིལ་པོར་ལུང་ལས་རིགས་པ་གཙོ་བོར་བཟུང་བ་དང་། རང་ལས་གཞན་གཙོ་བོར་བཟུང་ནས་སྲོག་དབུགས་ཐོགས་ཚད་ཀྱི་སེམས་ཅན་རྣམས་ཀྱི་བདེ་བ་སྒྲུབ་ཐབས་དང་སྡུག་བསྔལ་སེལ་ཐབས་ཆེད་ཆེས་བླ་ན་མེད་པའི་མཛད་པ་བསྐྱངས་ཡོད།

         བརྒྱད། དེ་མིན་གང་ཉིད་ཀྱིས་མི་ལོ་ཧྲིལ་པོ་བཞི་བཅུ་ལྷག་གི་རིང་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལྷག་གསུངས་ཡོད་པར་མ་ཟད། དེ་དག་ཚུར་མདོར་བསྡུས་ནས་བཤད་ན། ལྟ་བ་རྟེན་འབྱུང་དང་། སྤྱོད་པ་འཚེ་བ་མེད་པ་གཉིས་དང་མ་འབྲེལ་བ་གཅིག་ཀྱང་མེད། དེ་ཡང་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པ་གཉིས་ནི་རང་གཞན་གཉིས་ཀ་སྡུག་བསྔལ་རྒྱུ་དང་བཅས་པ་ལས་གྲོལ་བའི་ལམ་ཉག་གཅིག་ཡིན་པར་གསུངས་པ་རེད།

        གོང་གསལ་གྱི་རྒྱུ་མཚན་དེ་དག་ཙམ་མ་ཟད། ཐ་ན་སྐུ་བཞུགས་སྟངས་དང་། ན་བཟའ་མཆོད་སྟངས། ཕེབས་སྟངས་སོགས་ཀྱང་སྟོན་པ་བཞན་གང་ལས་ཀྱང་ཁྱད་པར་དུ་འཕགས་པ་ཞིག་ཡིན་པ་ཁོང་གི་རྩོད་མེད་ཡོངས་གྲགས་ཀྱི་རྣམ་ཐར་སོགས་ལས་ལེགས་པར་གཟིགས་ཐུབ་པ་ཞིག་རེད།

            འདི་ལྟ་བུའི་སྟོན་པ་ཁྱད་པར་ཅན་ཞིག་ང་ཚོ་བོད་མི་རིགས་ཀྱི་མགོན་སྐྱབས་དམ་པར་ཤར་བར་མ་ཟད། ང་ཚོ་བོད་མིའི་བརྒྱ་ཆའི་དགུ་བཅུ་ཙམ་ཁོང་གི་རྗེས་འཇུག་པ་ཤ་སྟག་ཡིན། འོན་ཀྱང་བློ་ཕམ་པ་ཞིག་ལ་འདས་པའི་ལོ་རྒྱུས་ནང་གྲྭ་བཙུན་སྔགས་གསུམ་ཙམ་མ་གཏོགས། བོད་མི་དཀྱུས་མ་ཕལ་མོ་ཆེའི་ཁྲོད་སྟོན་པ་བཀའ་དྲིན་ཅན་གྱི་རྣམ་ཐར་དང་ཆོས་ལ་སློབ་སྦྱོང་བྱེད་པའི་ལམ་སྲོལ་རྦད་དེ་མ་དར་བར་མ་ཟད། དགོན་སྡེ་ཁག་གི་སློབ་དཔོན་དང་དགེ་བའི་བཤེས་གཉེན་རྣམ་པས་ཀྱང་མི་མང་དཀྱུས་མར་ནང་ཆོས་ཀྱི་གཞི་ལམ་འབྲས་གསུམ་གྱི་རྣམ་གཞག་ངོ་སྤྲོད་ཀྱི་མཛད་པ་མ་བསྐྱངས་སྟབས། བསྟན་དང་སྟོན་པར་ཤེས་ནས་དད་པ་ཐོབ་པའི་བོད་མིའི་གྲངས་འབོར་ནི་བསམ་ཡུལ་འདས་པའི་ཉུང་ཉུང་རེད། ལྷག་པར་དུ་ད་ལྟའི་ཆར་འཛམ་གླིང་འདིར་ཁྱབ་རྒྱ་ཆེ་བའི་སྐད་ཡིག་མི་འདྲ་བ་ཧ་ཅང་མང་པོའི་ནང་བདག་ཅག་གི་སྟོན་པའི་མཛད་རྣམ་བརྒྱ་ཕྲག་སུམ་ཅུར་ཉེ་བ་མཇལ་རྒྱུ་ཡོད་པས། དེ་ནི་ཧང་སང་དགོས་པའི་གནས་ཚུལ་ཞིག་རེད། གྲངས་འབོར་འདི་ལྟ་བུ་ནི་མིའི་རིགས་ཀྱི་ལོ་རྒྱུས་ནང་དེ་སྔར་བྱུང་མྱོང་མེད་པའི་ལོ་རྒྱུས་ཀྱི་ཟིན་ཐོ་གསར་པ་ཞིག་རེད། འདི་ལྟ་བུའི་སྐྱེས་བུ་དམ་པ་ཞིག་གི་ཆོས་དང་རྣམ་ཐར་ལ་བོད་མི་ཕལ་མོ་ཆེས་རྨོངས་དད་རྐྱང་རྐྱང་བྱས་ནས་བསྡད་ན་དེ་ནི་ང་ཚོའི་གྱོང་གུད་ཆེན་པོ་ཞིག་རེད། ཕྱོགས་གཅིག་ནས་བཤད་ན་བོད་རིགས་རྒན་པ་མང་ཆེ་བ་ཞིག་ཡིག་རྨོངས་ཅན་ཤ་སྟག་ཡིན་པ་དང་། ཕྱོགས་གཞན་པ་ཞིག་ནས་བཤད་ན། ཡི་གེ་ཀློག་ཐུབ་ཙམ་ཡོད་མཁན་གྱི་བོད་མི་ཚོས་ཀྱང་བོད་ཀྱི་སྐད་ཡིག་ཐོག་བཞུགས་པའི་སྟོན་པའི་རྣམ་ཐར་ཁག་རྒྱ་ཆེ་བ་དང་ནང་དོན་གཏིང་ཟབ་པ་ཤ་སྟག་ཡིན་སྟབས། གོ་བ་ཇི་བཞིན་ལེན་ཐུབ་རྒྱུ་ཧ་ཅང་གིས་ཁག་པོ་རེད།

p2545826838.jpg

        རྒྱུ་མཚན་འདི་དག་ལ་བརྟེན་ནས་ད་ལྟའི་ཆར་འཛམ་གླིང་གི་སྐད་ཡིག་འདྲ་མིན་ཐོག་བཞུགས་པའི་རྩོད་མེད་ཡོངས་གྲགས་ཀྱི་སྟོན་པའི་རྣམ་ཐར་ཕལ་མོ་ཆེར་ཞིབ་འཇུག་གཏིང་ཟབ་ཀྱིས་བསྒྲིགས་པའི་སྟོན་པ་བཀའ་དྲིན་ཅན་གྱི་ཐེག་པ་ཐུན་མོང་གི་མཛད་རྣམ་ཞིག་གཞི་རྩར་བཟུང་ནས་ཕབ་སྐྲུན་བྱས་པའི་རྒྱ་གར་གྱི་མུ་འབྲེལ་བརྙན་འཕྲིན་ཟློས་གར« སངས་རྒྱས»ཞེས་པའི་ལེའུ་ང་ལྔའི་བདག་ཉིད་ཅན། འཛམ་གླིང་གི་ས་ཕྱོགས་གང་ས་ནས་བསྟོད་བསྔགས་ཤུགས་ཆེར་བྱེད་བཞིན་པ་འདི་རང་རེའི་བོད་སྐད་ཐོག་བསྒྱུར་ཐུབ་ན། དེས་བོད་སྐད་མ་གཏོགས་སྐད་ཡིག་གཞན་མི་ཤེས་པ་དང་། ལྷག་པར་དུ་ཡིག་རྨོངས་ཅན་གྱི་བོད་མི་རྒན་གཞོན་ཧ་ཅང་མང་པོའི་སེམས་ནང་དད་པའི་ས་བོན་བླ་ན་མེད་པ་ཞིག་བསྐྲུན་ཐུབ་ངེས་རེད་བསམས་ནས། ཨ་མདོ་རྔ་བའི་ཚོང་བ་སྐུ་ཞབས་བློ་གསལ་སོགས་ཀྱིས་འགྲོ་གྲོན་ཡོངས་རྫོགས་བཏང་བ་བཞིན་ཨ་མདོ་བོད་སྐད་བརྙན་འཕྲིན་གྱི་སྐད་སྒྱུར་ཚན་པ་བརྒྱུད་དངོས་སུ་གློག་བརྙན་དེ་བོད་སྒྱུར་ལེགས་འགྲུབ་ཀྱིས་བོད་ཀྱི་མདོ་དབུས་ཁམས་གསུམ་གྱི་ས་གནས་སོ་སོར་འགྲེམ་སྤེལ་བྱས་དང་བྱེད་བཞིན་ཡོད།

               གློག་བརྙན་འདིའི་ཁྱད་ཆོས་གཙོ་བོ་འགའ་ཞིག་ཟུར་དུ་བརྗོད་ན།

        གཅིག གློག་བརྙན་འཁྲབ་གཞུང་རྩོམ་པ་པོ་ནི་རྒྱ་གར་བ་ཞིག་ཡིན་པར་མ་ཟད། རྒྱ་གར་གྱི་ཆོས་རིག་གོམས་གཤིས་གང་ལའང་རྒྱུས་མངའ་ཆེན་པོ་ཡོད་པའི་ཉམས་ཞིབ་པ་གྲགས་ཅན་ཞིག་རེད།འཁྲབ་གཞུང་འདི་སྒྲིག་སྐབས་རྒྱ་གར་གྱི་སྐད་ཡིག་ཐོག་ཏུ་བཞུགས་པའི་སྟོན་པ་བཀའ་དྲིན་ཅན་གྱི་རྣམ་ཐར་ཙམ་མ་ཡིན་པར། འཛམ་གླིང་གི་སྐད་ཡིག་འདྲ་མིན་ཐོག་བཞུགས་པའི་བདག་ཅག་གི་སྟོན་པའི་རྣམ་ཐར་ཁག་དཔྱད་གཞིར་བཟུང་ནས་བསྒྲིགས་པ་ཞིག་ཡིན་སྟབས། འཁྲབ་གཞུང་འདི་བདག་ཅག་གི་སྟོན་པའི་རྣམ་ཐར་འཁྲབ་གཞུང་ཚད་འཛིན་འོས་པ་ཞིག་ཏུ་བརྩི་ཆོག

          གཉིས། ལྷག་དོན་རྣམ་ཐར་འཁྲབ་གཞུང་འདི་བདག་ཅག་གི་སྟོན་པས་ཐུན་མོང་དང་ཐེག་པ་ཐུན་མོང་གི་སྣང་ངོར་མཛད་པ་གང་བསྟན་དག་གཞི་རྩར་བཟུང་ནས་བསྒྲིགས་པ་ཞིག་ཡིན་སྟབས།ལོ་རྒྱུས་ཀྱི་དོན་སྙིང་ལྡན་པའི་རྣམ་ཐར་ཞིག་ཡིན་པར་མ་ཟད། འཛམ་གླིང་འདིའི་སྟེང་གི་ནང་པའི་ཐེག་པ་ཆེ་ཆུང་གི་རྗེས་འབྲངས་པ་ཡོངས་རྫོགས་ཀྱིས་ཁས་ལེན་རུང་བའི་རྣམ་ཐར་འཁྲབ་གཞུང་ཞིག་རེད།

微信图片_20201111191539.jpg

                 གསུམ། རྣམ་ཐར་འཁྲབ་གཞུང་འདིས་བདག་ཅག་གི་སྟོན་པའི་ཐེག་པ་ཐུན་མོང་གི་རྣམ་ཐར་གྱི་གཙོ་གནད་ཟིན་ཡོད་པར་མ་ཟད། རྣམ་ཐར་འཁྲབ་ཡུལ་གྱི་འཁོར་ཡུག་དང་། འཁྲབ་སྟོན་པ། ཆས་གོས་སོགས་རྣམ་ཐར་འཁྲབ་གཞུང་གི་སྤྱི་ཁོག་དང་ཡོངས་སུ་མཐུན་པར་མ་ཟད། རྣམ་ཐར་འཁྲབ་སྟོན་པ་ཚོའི་ངག་གི་སྨྲ་བརྗོད་དང་། ལུས་ཀྱི་རྣམ་འགྱུར། གཟིགས་དབྱིབས། བཞིན་གྱི་མདངས་སོགས་ཕུལ་དུ་བྱུང་བ་ཤ་སྟག་རེད།

            བཞི། རྣམ་ཐར་འཁྲབ་གཞུང་འདིའི་ནང་འཛམ་གླིང་འདིའི་ས་གནས་གང་སར་བཞུགས་པའི་ནང་པ་ཡོངས་ཀྱི་གཙུག་རྒྱན་དམ་པར་གྱུར་པའི་སྐྱེས་བུ་མང་པོའི་ལམ་སྟོན་ཡོད་སྟབས། རྣམ་ཐར་འཁྲབ་གཞུང་འདི་དེ་སྔར་བདག་ཅག་གི་སྟོན་པའི་རྣམ་ཐར་འཁྲབ་གཞུང་ཡོད་ཚད་ལས་ཁྱད་པར་དུ་འཕགས་པའི་རྣམ་ཐར་འཁྲབ་གཞུང་ཞིག་རེད།

            ཅི་ཙམ་གྱིས་བདག་ཅག་གི་སྟོན་པའི་སྐུ་གསུང་ཐུགས་ཀྱི་མཛད་པ་སྐྱོང་སྟངས་ཐད་མཁྱེན་རྟོགས་ཡོད་ན། དེ་ཙམ་གྱིས་བདག་གི་སྟོན་པར་དད་པ་ཡང་དག་པ་དང་། བརྟན་པོ་ཞིག་སྐྱེས་ཐུབ་པར་ཕན་ཐོགས་ཆེན་པོ་བཤད་མ་དགོས་པ་ཞིག་རེད་ཞུ་རྒྱུ་ཡིན།

          མཇུག་ཏུ་བསྟན་པ་སྤྱི་དང་ལྷག་དོན་ཚང་ལ་མ་ནོར་བའི་བོད་བརྒྱུད་སངས་རྒྱས་ཀྱི་བསྟན་པ་འདི་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པ་དང་། དེ་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་བསྐལ་བ་རྒྱ་མཚོའི་བར་དུ་བརྟན་པ་དང་། དེ་ལ་བརྟེན་ནས་འཛམ་གླིང་འདིར་ནད་མུག་འཁྲུག་རྩོད་ཀྱི་འཇིགས་པ་ཀུན་མྱུར་ནས་མྱུར་དུ་ཞི་བའི་སྨོན་པ་གྲངས་མེད་ཞུ་རྒྱུ་ཡིན།ཐུགས་རྗེ་ཆེ།


  • ཟུར་བཀོད། 

            དགོས་དབང་གིས་གཏགས་ནོར་དང་ཡིག་ནོར་རེ་ཟུང་བཅོས་པ་ལས་གཞན་མ་རྩོམ་ལྟར་ཇི་བཞིན་བཀོད་ཡོད། 

            སངས་རྒྱས་ཞེས་པའི་ལེའུ་ང་བཞི་ཅན་བོད་བསྒྱུར་ལེགས་འགྲུབ་མཛད་སྒོ། http://www.filmtbt.com/news/don/2017-12-22/798.html

གསལ་བཤད། 

        རྩོམ་འདི་ནི་དྲ་བའི་མ་རྩོམ་ཡིན་པས།  གང་བྱུང་དགོད་མི་རིགས།  བརྒྱུད་ལམ་གཞན་པས་དགོད་འདོད་ཚེ། ངེད་དྲ་བའི་ཆོག་མཆན་ཐོབ་དགོས། དེ་མིན་ངེས་པར་རྩད་གཅོད་བྱ་ངེས། 


དཔྱད་མཆན་ཡོད།