དབུགས་ལྒང་དང་སྲུང་ཤུབས་གཉིས་རྐྱེན་བྱས་ཤིང་། དེ་གཉིས་ཕན་ཚུན་རྐྱ་འཐབ་པ་ལྟར་གློག་བརྙན་གྱི་འགོ་རྔ་མཇུག་གསུམ་དུ་ཁྱབ་ཅིང་། དེ་ཡི་རྐྱེན་གྱིས་བསམ་ཡུལ་ལས་འདས་པའི་དོན་དག་ཆེ་མ་ཆུང་གསུམ་བསླངས་ཤིང་། དེ་ནི་ང་རང་ཚོའི་ཉིན་རྒྱུན་འཚོ་བའི་ཁྲོད་བྱུང་བཞིན་པ་དེའོ།། གློག་བརྙན་འདིའི་ཡིད་བརྙན་གྱིས་བག་ཆགས་གཏིང་ཟབ་ཡོད་བཞག་མྱོང་སྟེ། ཡིད་བརྙན་གལ་ཆེན་གསུམ་ནི་གློག་བརྙན་གྱི་ཁ་ཕྱོགས་འགྱུར་མཚམས་གལ་ཆེན་གསུམ་ཡིན་ཏེ། ཡིད་བརྙན་དང་པོ་དེ་ཕུ་བོའི་བརྒྱབ་ཀྱི་སྨེ་དེ་བཀོག་ནས་མཚོ་འགྲམ་གྱི་བྱེ་ཐང་སྟེང་ནས་བྱིས་པ་གསུམ་རྒྱུགས་ཤར་གློད་པ་དེ་ཡིན་ཞིང་། དེས་མ་རྒན་གྱི་རྣམ་ཤེས་ཐད་ལ་དོགས་འདྲི་ཚ་ནན་ཞིག་བྱས་ཡོད། གཉིས་པ་ནི་ཕ་རྒན་འདས་རྗེས་གནམ་སའི་འདྲེས་མཚམས་སུ་དམར་སེར་གྱི་མདངས་འཕྲོ་བའི་མཚམས་སྤྲིན་གྱི་རྣམ་པ་དེ་ཡིན་ལ། དེས་ཕ་རྒན་ཚེ་ལས་འདས་པ་དང་རྣམ་ཤེས་ཁ་བྲལ་བ། ཕྱི་མའི་ཡུལ་དུ་གཤེགས་པའི་སྐྱོ་གདུང་མཐའ་དག་གསལ་ལེར་མཚོན་པར་བྱས་ཡོད། ཡིད་བརྙན་གསུམ་པ་དེ་ནི་སྒྲོན་དཀར་གྱིས་གད་བདར་ནང་གི་ཆུ་བཟུང་ནས་ཡོང་བའི་རྣམ་པ་དེ་ཡིན་ལ། འདར་འགུལ་དང་གཡོ་སྐྱོམ། གསལ་བ་ནས་མི་གསལ་བ། མི་གཡོ་བ་ནས་གཡོ་བའི་འགྱུར་ལྡོག་ཅིག་བརྒྱུད་དེ་ཁོ་མོའི་མཐའ་མའི་གདམ་ག་དེ་མཚོན་ཡོད་ལ། ཡང་གཅིག་བཤད་ན་དེར་མཐུད་དེ་གློག་བརྙན་བྱུང་རིམ་མཐོ་རླབས་སུ་བསྐྱལ་བ་ཡིན། ཡིད་བརྙན་འདི་དག་གློག་བརྙན་གྱི་ནང་དུ་སིམ་ཡོད་པས། མ་གཞི་དེ་འདྲའི་མངོན་སུམ་གྱི་བྱུང་བ་ཅིག་ལྐོག་གྱུར་དང་སྦྱར་ཞིང་། རྟོག་བཏགས་དང་བསམ་གཞིགས་རྒྱ་ཡན་དུ་བསྐྱེད་པར་འདོད་པས། འདི་ནི་གློག་བརྙན་འདིའི་ཁྲོད་འབུར་དུ་ཐོན་པའི་ཁྱད་ཆོས་ཤིག་དང་དམིགས་བསལ་ཞིག་ཏུ་ཆགས་ཡོད་པར་འདོད།

དབུགས་ལྒང་ནི་གློག་བརྙན་འདིའི་ཡིད་བརྙན་གལ་ཆེན་ཞིག །ཐོག་མའི་སྲུང་ཤུབས་དཀར་པོ་ནས་མཐའ་མའི་དབུགས་ལྒང་དམར་པོའི་འགྱུར་བའི་གོ་རིམ་ཧྲིལ་བོར། ཨ་རྒྱ་གྲོངས་ཤིང་རྣམ་ཤེས་ཕྱིར་ཁྱིམ་ལ་འཁོར་བ་དང་། སྲུང་ཤུབས་ཀྱི་རྐྱེན་པས་སྡེ་བ་ནང་གི་ཁྱིམ་ཚང་རེ་འགའ་ངོ་ཚར་གཏད་པ། དར་རྒྱས་བཟའ་ཚོ་གཉིས་ཀྱི་སྲུང་ཤུབས་ཚར་པ་དང་དེ་ནས་ཐོབ་པ་ཡང་བོར་བ། ཨ་ནེས་དཀར་ཐིག་བསླངས་རྗེས་དགོན་པར་ལོག་པ། སྒྲོལ་དཀར་ཡང་སྨན་ཁང་ནས་དགོན་པར་ཁྲིད་པ། འཇམ་དབྱངས་ཀྱིས་སློབ་བྱོལ་གྱི་བསམ་པ་བསྟན་པ། བྱིས་པ་གཉིས་ཀྱི་དབུགས་ལྒང་ཐོབ་འདོད་ཀྱི་རེ་བ་མཐའ་མར་བསྐངས་ན་ཡང་དེ་ལས་གཅིག་བཀད་ཅིང་གཅིག་ནམ་མཁར་འཕུར་བ་སོགས་གཏམ་རྒྱུད་ཆུང་ངུ་མང་དུ་བྱུང་། གཏམ་རྒྱུད་ཆུང་ངུ་འདི་དག་གང་ལ་མཚོན་ན་ཡང་བོད་ཁུལ་ནས་བྱུང་མྱོང་བའམ་འབྱུང་གིན་པ་ཞིག་སྟེ། འཁྱོག་པོར་མི་བརྗོད་ལ་རབ་ཏུ་མི་འདོགས་པ། འུད་ཀྱིས་མི་སྤུར་བ་སོགས་ཁོང་གིས་གསར་རྩོམ་གྱི་གོ་རིམ་ཧྲིལ་བོར་སྤྱི་ཚོགས་དངོས་མཚོན་པའི་གསར་རྩོམ་གྱི་རྣམ་འགྱུར་ཞིག་ལྷུར་ལེན་བཞིན་པ་ལྟར། གློག་བརྙན་འདི་ལས་ཀྱང་ང་ཚོས་སྔར་བཞིན་ཁོའི་དངོས་ཡོད་རིང་ལུགས་ཀྱི་མཐོང་སྣེ་དང་གཤིས་ལུགས་མཐོང་ཐུབ།