—— པདྨ་ཚེ་བརྟན་གྱི་གློག་བརྙན་《ལྷིང་འཇགས་ཀྱི་མ་ཎི་རྡོ་འབུམ》བལྟས་རྗེས་ཀྱི་སེམས་ཚོར།
ཐེངས་དང་པོར་གློག་བརྙན་<ལྷིང་འཇགས་ཀྱི་མ་ཎི་རྡོ་འབུམ>ལ་བལྟ་དུས་ནི་ལོ་འགའི་ཡར་སྔོན་གྱི་ཁོ་བོ་སློབ་ཆེན་འགྲིམས་བཞིན་པའི་སྐབས་ཡིན། དེའི་སྔོན་ལ་ཁོ་བོས་པདྨ་ཚེ་བརྟན་ལགས་ཀྱིས་བརྩམས་གནང་པའི་སྒྲུང་གཏམ་མང་དུ་བཀླགས་མྱོང་ཞིང༌། ཁོང་གི་སྒྲུང་གཏམ་ལ་དགའ་མོས་ཡོད་མཁན་ཞིག་ཀྱང་ཡིན། གློག་བརྙན་དེར་བལྟས་མ་ཐག་དུ་ཁོ་བོའི་བསམ་གཞིགས་ཀྱི་ཧྲག་བར་ཡངས་པོར་ཕྱེས་བྱུང་པ་དང༌། ཉམས་འུར་པའི་འདུ་ཤེས་དྲག་དུ་བསྐྱེད་པའི་སྣང་ཚུལ་དེ་མི་ལོ་གསུམ་ལྷག་འགོར་རྗེས་ཀྱི་ད་སྐབས་ཀྱང་དྲན་པའི་ངོས་ན་གསལ་ལྷང་ངེར་འདུག དེའི་རྗེས་སུ་གློག་བརྙན་འདི་བལྟས་རྗེས་ཀྱི་བསམ་ཚུལ་སྐོར་གྱི་རྩོམ་ཐུང་ཞིག་འབྲི་འདོད་ཀྱི་ཀུན་སློང་དྲག་ཏུ་རྒོད་ན་འང་རང་སྟེང་གི་སྒྱིད་ལུག་དང༌། ཕྱིའི་རྒྱུ་རྐྱེན་སྣ་ཚོགས་ཀྱི་དབང་གིས་གནས་སྐབས་དེ་ནས་ཉིན་ཐོ་ཞིག་ལས་འབྲི་མ་ཐུབ་པར་ད་བར་དུ་ལུས་སོང༌།
སྤྱིར་གློག་བརྙན་སྒྱུ་རྩལ་ནི་གཏམ་རྒྱུད་དང་ཟློས་གར་འཁྲབ་སྟོན་གཙོར་བཟུང་པའི་སྟེང༌། འཁྲབ་གཞུང་དང༌། རོལ་མོ། མཛེས་རིས། བརྙན་རིས་སོགས་སྒྱུ་རྩལ་སྣ་མང་གཅིག་འདུས་ཀྱི་ཕུངས་པོ་ཞིག་ཡིན་པའི་བཞེད་ཚུལ་ཡོད་ལ། གཞན་གོས་སྨྲོས་སྒྱུ་རྩལ་རྣམ་པ་དེ་དག་ལས་ཡན་གར་བའི་སྒྱུ་རྩལ་རྣམ་པ་གསར་བ་ཞིག་ཡིན་པར་ངོས་འཛིན་མཁན་ཡང་ཡོད། གང་ལྟར་དེང་སྐབས་དཔལ་འབྱོར་རིག་གནས་ཀྱི་འཁོར་རྒྱུགས་རྣམ་པར་རྒོད་པའི་དུས་སུ་ཡང་སྒྱུ་རྩལ་ལས་རིགས་འདིར་སྔར་ལས་ལྷག་པའི་གསོན་ཤུགས་མངོན་འོངས་ཀྱིན་འདུག་ལ། དེར་རོལ་མྱོང་བྱེད་པ་འམ་དཔྱད་བརྗོད་སྤེལ་བར་ཡང་གོང་སྨོས་སྒྱུ་རྩལ་རིགས་སོ་སོར་བྱང་ཆ་ལྡན་པ་ཞིག་ཡིན་དགོས། ཡིན་ནའང་ཁོ་བོ་ནི་ཆུང་དུས་ནས་དཔེ་ཀློག་ཁོ་ནར་མགོ་འཁོར་ནས་འཚར་ལོངས་བྱུང་མཁན་ཞིག་ཡིན་པས་ན། སྒྱུ་རྩལ་གཞན་དག་སྐོར་ལ་ཆ་རྒྱུས་མེད་ཅིང་མ་ཤེས་ཤེས་འདོགས་ཀྱི་གཏམ་ཡང་བརྗོད་རྩིས་མེད། འདིར་སྐབས་སུ་བབས་པ་གློག་བརྙན་འདིས་བརྗོད་པའི་གཏམ་རྒྱུད་དང་བྱུང་རིམ་སྐོར་ནས་རང་ཉིད་ཀྱི་མྱོང་ཚོར་ཕྲན་བུ་ལབ་རྩིས་ཡོད།
གློག་བརྙན་འདིས་ནང་དུ་ལོ་ན་གཞོན་པའི་གྲྭ་བ་ཆུང་ཆུང་ཞིག་ལོ་སར་སྐབས་དགོན་པ་ནས་ཕྱིར་སྡེ་བའི་ནང་དུ་ལོག་པའི་བར་གྱི་བྱུང་བ་བརྗོད་ཡོད་ལ། ཕར་སོང་ཚུར་ཡོང་གི་བརྒྱུད་རིམ་ཁྲོད་དུ་འཕྲད་པའི་མཚོན་རྟགས་རང་བཞིན་ཆེས་ཆེར་ལྡན་པའི་བྱ་དངོས་ཏེ། ལམ་བར་ནས་འཕྲད་པའི་རྡོ་བཟོ་རྒན་པོ་བསོད་བྷ་དང་ཁོའི་མ་ཎི་རྡོ་འབུམ། ཁོ་ཚང་གིས་ཉོས་པའི་བརྙན་འཕྲིན་འཕྲུལ་ཆས་དང་དེའི་ནང་གི་ཐང་སིན་བླ་མའི་རྣམ་ཐར། ཁོའི་ཕུ་བོ་དང་དེས་འཁྲབ་སྟོན་བྱེད་བཞིན་པའི་ཟློས་གར་དྲི་མེད་ཀུན་ལྡན་གྱི་རྣམ་ཐར། སློབ་གྲྭར་འགྲོ་བཞིན་པའི་ནུ་བོ་དང་ཁོའི་བསླབ་གཞི། གཞན་ཨ་མྱེས་རྒན་པོ་དང་དེའི་སྤྱོད་རྣམ་སོགས་ཟུར་སྣེ་སྣ་མང་བརྒྱུད་དེ་ད་ལྟའི་བོད་སྤྱི་ཚོགས་ཉིད་བལྟ་མཁན་རྣམ་པའི་མིག་མདུན་དུ་གསལ་བོར་བསྟར་ཡོད་པ་དང༌། གློག་བརྙན་ནང་གི་མི་སྣ་གཙོ་བོ་གྲྭ་བ་ཆུང་ཆུང་དེས་བྱ་དངོས་འདི་དག་ལ་འཕྲད་སྐབས་ཀྱི་བྱ་སྤྱོད་དང་རྣམ་འགྱུར་བརྒྱུད་དེ་ཁོའི་འགལ་ཟླའི་འདུ་ལོང་འཁྲུག་པའི་སེམས་ཁམས་དེས་གསལ་བོར་མཚོན་ཡོད། ད་ནི་ཁོ་བོས་རང་བློ་དཔག་ཚོད་ཀྱིས་གློག་བརྙན་འདིའི་ནང་གི་བྱུང་རིམ་རེ་རེ་གསེད་གྲོལ་སྒོས་དབྱེ་ཞིབ་རགས་ཙམ་བྱེད་པར་བྱ་སྟེ།
ཀུན་གྱིས་ཤེས་གསལ་ལྟར་སྐུ་ཞབས་པདྨ་ཚེ་བརྟན་ལགས་ཀྱི་གློག་བརྙན་འདིར་རྒྱལ་ཁབ་ཕྱི་ནང་ནས་བྱ་དགའ་མང་དུ་ཐོབ་མྱོང་པ་དང༌། བྱ་དགའ་ཐེངས་ཤིག་གི་སྐབས་སུ་ཐོབ་པའི་གདེངས་འཇོག་གི་ནང་དོན་ཧ་ལམ་འདི་ལྟར་ཏེ། གློག་བརྙན་འདིས་སྤྱི་ཚོགས་སམ་རིག་གནས་གང་དེའི་འགལ་འདུ་དག་མཚོན་པ་ཁ་གསལ་ཞིང་གཏིང་དཔོག་ཞེས་པ་དེ་རེད། ཁོ་བོ་སྐད་ཆ་འདིར་ཤུན་ཏུ་ནས་འཐད་དེ་སྤྱི་ཚོགས་སམ་རིག་གནས་སོ་སོར་ཡང་འཕེལ་རྒྱས་ཀྱི་གནས་བབས་ཀུན་ཏུ་འགལ་ཟླ་རབས་དང་རིམ་པ་མང་དུ་འཕྲད་ངེས་པ་ཆོས་ཉིད་རེད། འོན་ཀྱང་འགལ་འདུ་དེ་དག་སྒྱུ་རྩལ་བ་གང་དེས་རྟོགས་ཤིང་རྙེད་པ་མ་ཟད། སྒྱུ་རྩལ་བརྩམས་ཆོས་ཀྱིས་ལམ་ནས་དེ་གསལ་བོར་མཚོན་པ་ནི་ཤིན་ཏུ་དཀའ་བའི་གནས་ཤིག་གོ། གློག་བརྙན་<ལྷིང་འཇགས་ཀྱི་མ་ཎི་རྡོ་འབུམ་>གྱི་འཁྲབཁྲིད་པ་པདྨ་ཚེ་བརྟན་ལགས་ནི་དཀའ་གནད་དེ་ཁྱད་དུ་གསོད་ཐུབ་མཁན་གྱི་མི་རེ་གཉིས་གྲས་སུ་གཏོགས་པ་གློག་བརྙན་འདི་ལས་བརྡར་ཤ་གཅོད་ཐུབ།
གློག་བརྙན་འགོ་བརྩམས་ནས་ཡུན་རིང་མ་འགོར་བར་འགལ་འདུའི་འགོ་བརྩམས་སོང་པ་སྟེ། གྲྭ་བ་ཆུང་ཆུང་དེ་སྤྲུལ་སྐུ་ཚང་ལ་སོང་མ་ཐག་དུ་བརྙན་འཕྲིན་འཕྲུལ་ཆས་ཀྱིས་ཡིད་དབང་བཀུགས་སོང་པ་དང༌། དེའི་འཕྲོར་བརྙན་འཕྲིན་ལ་བལྟ་ཆེད་དུ་སྲོལ་རྒྱུན་གྱི་རོལ་རྩེད་ཐེ་ཀ་ཚོན་མདོག་ཅན་དེ་ཕངས་མེད་དུ་སྤྲུལ་སྐུ་ལ་བྱིན་སོང༌། སྤྲུལ་སྐུའི་ཁྱིམ་ནས་དྲི་མེད་ཀུན་ལྡན་གྱི་རྣམ་ཐར་བརྙན་འཕྲིན་ནས་བལྟ་སྐབས་སུ། སྤྲུལ་སྐུས་ཀྱང་རྣམ་ཐར་ཟློས་གར་འདིར་སེམས་རྣལ་དུ་ཕབ་ནས་རོལ་མྱོང་མི་བྱེད་པར་དེའི་ནང་གི་བརྒྱུད་རིམ་མང་པོ་ཞིག་ཕར་བསློགས་སོང༌། བྱུང་རིམ་ཕྲ་མོ་འདི་དག་བརྒྱུད་དེ་འགལ་འདུ་མཚོན་མགོ་བརྩམས་སོང་ནའང༌། དེ་དག་ནི་འགོ་བརྩམས་པ་ཙམ་སྟེ། དེ་ལས་རྣོ་ངར་ཆེ་བ་འགལ་འདུ་རྗེས་ན་ཡོད། ཕྱིར་སྡེ་བའི་ནང་དུ་ཐོན་དུས་ཀྱི་རྒྱ་ལོའི་ཚེས་གཅིག་ཉིན་འགལ་འདུ་མང་པོ་གཅིག་བསྡུས་སྒོས་མངོན་བྱུང༌། དཔེར་ན། གྲྭ་བ་ཆུང་ཆུང་བརྙན་འཕྲིན་ཟློས་གར་ཐང་སིན་བླ་མའི་རྣམ་ཐར་གྱིས་ཡིད་དབང་ཅིག་ཅར་དུ་འཕྲོག་པ་དང་ཁོས་སྤྲེའུ་སྟོང་ཉིད་རྟོགས་པའི་གདོང་འབག་གོན་སྐབས་ཀྱི་ལུས་ཆ་ལུགས་ཀྱི་འགལ་འདུ། རྣམ་ཐར་འཆམ་མཁན་ཚོས་འཁྲབ་སྟོན་རྫོགས་རྗེས་སུ་ལུས་ཀྱི་འཆམ་ལྭ་ཡང་མ་ཕུད་པར་ཏུས་སི་ཁོ་རྩེ་བས་མཚོན་པའི་དུས་སྔ་ཕྱིའི་བྱ་སྤྱོད་ཀྱི་འགལ་འདུ། དྲི་མེད་ཀུན་ལྡན་གྱི་རྣམ་ཐར་ཟློས་གར་བལྟ་མཁན་རྒན་རྒོན་དང་བུད་མེད་སྐོར་ཞིག་ལས་མེད་པ་དང་རྭ་སྐོར་ཕྱི་རོལ་ན་ཤང་ཀང་གི་དྲག་རྩལ་བརྙན་འཕྲིན་བལྟ་སའི་ཁང་མིག་གཅིག་གི་ནང་དུ་བྱིས་པ་དང་ན་གཞོན་རྣམས་འཚང་ཡོད་པས་མཚོན་པའི་གནས་གོང་འོག་གི་འགལ་འདུ་དང་ལོ་རྒན་གཞོན་བར་གྱི་དགའ་མོས་ཀྱི་འགལ་འདུ། གྲྭ་བས་བོད་ཡིག་སྦྱངས་ན་ཆོས་ལེགས་པ་འདོན་ཐུབ་པར་སྙམ་པ་དང་ཁོའི་ནུ་བོས་རྒྱ་ཡིག་སྦྱངས་ནས་གྲོང་ཁྱེར་ཆེན་པོར་འགྲོ་འདོད་པའི་བསམ་བློའི་འཁྱེར་སོ་དང་ཕུགས་བསམ་མི་འདྲ་པའི་དབར་གྱི་འགལ་འདུ་སོགས་མིའི་སེམས་ལ་ཟུག་གཟེར་བཟོ་ཐུབ་པའི་འགལ་འདུ་སྣ་མང་གཅིག་ཏུ་བསྡུས་ཡོད། དེ་དག་ལས་ཀྱང་ཁོ་བོར་བག་ཆགས་ཆེས་ཟབ་པའི་འགལ་འདུ་ནི་གྲྭ་བ་ཆུང་ཆུང་དེའི་ལུས་སེམས་ཀྱི་འགལ་འདུ་ཡིན་ལ། བརྙན་འཕྲིན་མཇུག་རྫོགས་ལ་ཁད་ཀྱི་སྐབས་སུ་ཁོས་སྤྲེའུ་སྟོང་ཉིད་རྟོགས་པའི་གདོང་འབག་དེ་རུམ་ནས་བླངས་ཏེ་འཁེལ་མགོར་བཀལ་བ་དང༌། དེས་ནས་སྒོར་འབུད་རྩིས་བྱེད་སྐབས་ཡང་ཁ་ཕྱིར་ནས་བསམ་བློ་ཞིག་བཏང་རྗེས་སུ་ཡང་བསྐྱར་རུམ་ལ་བཅུག་པའི་བྱུང་རིམ་དེ་ཉིད་ཁོ་བོས་གློག་བརྙན་འདིའི་ནང་དུ་འགལ་འདུ་མཚོན་པའི་མཐོ་རླབས་ཡིན་པར་འདོད།
འཁྲབ་ཁྲིད་པས་གོང་གསལ་བྱུང་རིམ་ཁག་བརྒྱུད་དེ་དེང་རབས་བོད་སྤྱི་ཚོགས་ཁྲོད་ཀྱི་རྣམ་པ་འདྲ་མིན་གྱི་འགལ་འདུ་སྣ་ཚོགས་གསལ་བར་བསྟན་པ་བརྒྱུད། བོད་སྤྱི་ཚོགས་ཀྱི་གྲུ་ག་སོ་སོར་ལྷགས་པའི་དེང་རབས་རིག་གནས་དང་སྲོལ་རྒྱུན་རིག་གནས་དང༌། ཕྱི་ཡོང་རིག་གནས་དང་རང་སའི་རིག་གནས་སོགས་དབར་གྱི་འགལ་འདུ་གསལ་བོར་མཚོན་ཡོད་ལ། འགལ་འདུ་དེ་དག་གི་མདུན་དུ་བོད་མི་དཀྱུས་མ་རྒན་གཞོན་སེར་སྐྱ་སོ་སོའི་ལུས་ཀྱི་སྤྱོད་རྣམ་བརྒྱུད་དེ་སེམས་ཀྱི་འགལ་འདུ་གནད་དུ་ཐིངས་པར་མཚོན་པ་དང་ཆབས་གཅིག་གི་ཏུ་སྲོལ་རྒྱུན་གྱི་རིག་གནས་བཟང་པོ་དང་ཡབ་མེས་ཀྱི་གོམས་སྲོལ་དག་བོར་བརླགས་དང་རྒྱུན་ཆད་ནས་འགྲོ་བཞིན་པའི་སྐོར་ལ་ཕངས་སེམས་དང་གདུང་སེམས་སྐྱེས་པའི་རྣམ་འགྱུར་ཀྱང་གསལ་བོར་བསྟན་ཡོད། འདི་ལྟ་བུའི་ཉེན་ཁའི་འདུ་ཤེས་དེ་གློག་བརྙན་འདིས་ཁ་བྱང་ལྷིང་འཇགས་ཀྱི་མ་ཎི་རྡོ་འབུམ་ཞེས་པ་ལས་གསལ་བོར་མཚོན་ཡོད་དེ། རྡོ་བཟོ་རྒན་པོ་བསོད་བྷའི་བུ་ལྷ་སར་ཚོང་རྒྱག་པར་ཕྱིན་པ་དང༌། བུ་སོང་རྗེས་སུ་ཁོའི་ལག་ཤེས་འདིའི་རྒྱུན་ཆད་པར་དོགས་ནས་“ལུས་ཁོམ་རུང་སེམས་མི་ཁོམ་པས་ན”། （རྒན་པོ་བསོད་བྷའི་སྐད་ཆ）རྒྱ་ལོའི་ཚེས་གཅིག་ལ་ཡང་མ་ཎི་བརྐོ་བཞིན་ཡོད་པ་སོགས་གྲྭ་བ་ཆུང་ཆུང་དེའི་མཐོང་ཆོས་སུ་གྱུར་ཡོད། ཡིན་ན་འང་ཁོ་གཉིས་ཕྱིར་ལོག་དུས་རྒན་པོ་ཚེ་ལས་འདས་སོང་པ་དང༌། གྲྭ་བར་སྦྱིན་རྒྱུར་ཆེད་དུ་བརྐོས་པའི་མ་ཎི་རྡོ་བརྐོས་དེ་བརྐོ་འཕྲོར་ལུས་ཡོད། སྤྱིར་ཡིན་ན་གྲྭ་བ་དེས་རིག་གནས་ཤིག་གི་མཚོན་རྟགས་སུ་གྱུར་པའི་རྡོ་བརྐོའི་རིག་གནས་འདིའི་རྒྱུད་འཛིན་དང་འཕེལ་རྒྱས་སྐོར་ལ་བསམ་བློ་རེ་གཏོང་དགོས་འདུག་མོད། སྐབས་དེའི་གྲྭ་བ་ཆུང་ཆུང་གི་དྲན་ཤེས་ཡོད་ཚད་སྤྲེའུ་སྟོང་ཉིད་རྟོགས་པའི་སྟེང་ན་ཡོད་པས་གཞན་དག་ལ་བློ་འཁོར་ག་ལ་སྲིད། དེ་བས་ན་མ་ཎི་རྡོ་འབུམ་དེ་ལྷིང་འཇགས་སེར་ལྷགས་རླུང་ཁྲོད་དུ་ལུས་པ་མ་ཡིན་ནམ། ཉེན་ཁའི་འདུ་ཤེས་ཡོད་མཁན་ནི་རྡོ་བཟོ་བསོད་བྷ་གཅིག་པུ་མི་ཡིན་པར་ད་རུང་གྲྭ་བ་ཚང་གི་ཨ་མྱེས་རྒན་པོ་ཡང་འདུས། དོན་འདི་ཨ་མྱེས་རྒན་པོས་ཁོང་གི་ན་མཉམ་རྒན་པོ་བསོད་བྷ་ལ་བཅངས་པའི་གདུང་སེམས་དང༌། དྲི་མེད་ཀུན་ལྡན་གྱི་རྣམ་ཐར་ལ་བཅངས་པའི་བརྩེ་སེམས། གཞན་དེང་རབས་ཏིས་སི་ཁུ་ལ་བཟུང་པའི་སྡང་སེམས་བཅས་ཀྱི་སྟེང་ནས་མངོན་པར་མཚོན་ཡོད་ལ། ཁོའི་ཚ་བོ་ཚོར་ཡང་དང་བསྐྱར་དུ་ཚོགས་བསགས་དགེ་སྒྲུབ་བྱ་དགོས་ཚུལ་གྱི་ཁ་ཏ་བྱས་པའི་སྟེང་ནས་ཀྱང་ཝ་ལེར་རྟོགས་ཐུབ།
ཡིན་ནའང་འཁྲབ་ཁྲིད་པ་པདྨ་ཚེ་བརྟན་ལགས་ཀྱིས་ཀྱང་སྲོལ་རྒྱུན་རིག་གནས་ལ་དགག་བཞག་གང་ཡང་མེད་པར་རྒྱུན་འཛིན་དགོས་ཟེར་བ་ཡང་མ་ཡིན་ཏེ། དགག་བཞག་གི་བསམ་བློ་དེ་གློག་བརྙན་འདིའི་ནང་དུ་ཐེངས་གཉིས་ལ་མཚོན་ཡོད་པར་ཁོ་བོས་མཐོང༌། བོད་ཀྱི་སྲོལ་རྒྱུན་གྱི་རིག་གནས་ཀྱི་གཙོ་སྙིང་ཐུབ་བསྟན་རིག་གནས་ཀྱི་སྦྱིན་པའི་སྙིང་སྟོབས་མངོན་པར་མཚོན་པའི་དྲི་མེད་ཀུན་ལྡན་གྱི་རྣམ་ཐར་ནི་ཀུན་ལ་ཆ་རྒྱུས་ལྡན་པའི་གཏམ་རྒྱུད་ཅིག་ཡིན། གློག་བརྙན་འདིའི་ནང་དུ་དྲི་མེད་ཀུན་ལྡན་གྱི་སྦྱིན་པའི་མཛད་པ་ལས། བུ་ཕྲུག་སྦྱིན་པ་དང༌། ཆུང་མ་སྤྱིན་པ། སྤྱན་སྤྱིན་པ་དེ་གསུམ་པོ་དངོས་ཤུགས་གང་རུང་ནས་བསྟན་ཡོད་ལ། གྲྭ་བའི་ནུ་བོ་ཆུང་ཆུང་དེས་ངས་མིག་སྦྱིན་རྒྱུ་མིན། ངས་དེ་བཀོལ་ནས་དཔེ་ཆར་བལྟ་དགོས་ཞེས་པ་དང༌། ལྟད་མོ་བ་ན་གཞོན་བཟི་བོ་དེས་གྲྭ་བའི་ཕུ་བོར་ཁྱོད་ལ་ཆུང་མ་ཡང་མི་དགོས་ན་ང་ལ་སྟེར་རོགས་ཞེས་པ། དེའི་སྐབས་སུ་གྲྭ་བའི་ཕུ་བོས་མངོན་པའི་ཁོང་ཁྲོའི་རྣམ་འགྱུར་བཅས་ལས་ང་ཚོར་སྲོལ་རྒྱུན་རིག་གནས་ཀྱི་སྙིང་སྟོབས་སྐོར་ཤིག་དང་དངོས་ཡོད་འཚོ་བའི་དབར་གྱི་འགལ་འབྲེལ་སྐོར་ལ་མནོ་བསམ་གཏོང་དུ་འཇུག་སྲིད། ང་ཚོས་གྲྭ་བའི་ནུ་བོ་དེ་དང༌། ན་གཞོན་བཟི་བོ་དེ་གཉིས་ནི་རིམ་བཞིན་རྫུན་ཟོལ་མེད་པར་བདག་གཅེས་འཛིན་གྱི་འདུ་ཤེས་ཡོད་མཁན་ཞིག་དང༌། སྲོལ་རྒྱུན་ལ་མི་འཇིགས་པའི་སྙིང་སྟོབས་རིགས་ཤིག་གི་མཚོན་བྱེད་དུ་བཟུང་བའི་ཆ་ནས་བྱིས་སྒྲུང་མཁན་པོ་ཨན་ཏུའུ་ཧྲིན་ལགས་ཀྱི་སྨྱུག་འོག་གི་གོང་མས་ན་བཟའ་གྱོན་མེད་པར་སྒྲོག་མཁན་གྱི་བྱིས་པ་དེ་དང་ཡང་ཅུང་འདྲ་བར་མཐོང༌། འདི་ཡང་གོང་སྨོས་འགལ་འདུ་མཚོན་པ་ལས་རིག་གནས་ཀྱི་སྙིང་སྟོབས་རིགས་ཤིག་དང་དངོས་ཡོད་འཚོ་བའི་དབར་གྱི་འགལ་འདུ་མཚོན་པའི་གྲས་སུ་ཡང་བརྩི་ཆོག ཡང་གཅིག་བཤད་ན་འཁྲབ་ཁྲིད་པའི་ཀུན་སློང་ཁོ་བོས་གོང་དུ་སྨྲས་པ་དེ་གཉིས་ཀ་མ་ཡིན་པར། བོད་ཀྱི་སྲོལ་རྒྱུན་རིག་གནས་ཀྱི་སྙིང་སྟོབས་རིགས་དེར་གསལ་བཤད་དམ་དེར་བོད་མི་བྱིངས་ཀྱིས་ཇི་ལྟར་ངོས་འཛིན་ནམ་དང་ལེན་བྱེད་བཞིན་པའི་སྐོར་བལྟ་མཁན་སྤྱི་ལ་བསྟན་པ་ཞིག་ཡིན་ཡང་སྲིད། གཞན་གློག་བརྙན་འདིའི་ནང་དུ་བོད་ཀྱི་དམངས་ཁྲོད་སྲོལ་རྒྱུན་མི་ཉུང་བ་ཤིག་འདུས་པ་སྟེ། འཁྲབ་ཁྲིད་པས་ཆེད་དམིགས་སུ་ལོ་སར་གཏོང་སྐབས་ཀྱི་སྔ་ཕྱིའི་ཉིན་གཉིས་གསུམ་ཙམ་གྱི་དུས་ཚོད་འདི་འདེམས་དོན་ཡང་ས་གནས་དེ་གའི་དམངས་སྲོལ་ཆོ་ག་སྣ་ཚོགས་མཚོན་ཆེད་ཡིན་པ་འདྲ་སྟེ། དུས་ཡུན་ཐུང་ཐུང་དེའི་ནང་དུ། དགོན་པའི་ནང་གི་རབ་བྱུང་པ་དགེ་སློབ་དབར་དང༌། སྤྲུལ་སྐུ་ཆུང་ཆུང་དང་ཡོངས་འཛིན་དབར། གྲྭ་བ་ཆུང་ཆུང་དང་ཁོའི་ཨ་ཕ་དང་ཨ་མྱེས་སོགས་བཟའ་ཚང་ཕན་ཚུན་དབར་བཅས་སུ་མངོན་པའི་གུས་ལུགས་དམངས་སྲོལ་དང༌། ལོ་སར་གྱི་གོ་རིམ་དགུ་ཐུག་འཐུང་པ་དང་ལྷ་བསང་ཕུད་པ། སྒོ་ཟོག་ལ་ཡང་ལོ་སར་གཏོང་ཚུལ། སྒོ་ཕྱུགས་ཚེ་ཐར་ལ་གཏོང་པ། ཕྲུ་གུ་སྐྱེས་དུས་འགྲུལ་བར་མེ་འཕེན་པ་དང་གྲྭ་བས་ཆོས་འདོན་པ། མི་ཤི་དུས་རབ་བྱུང་པས་སྨོན་ལམ་གསུངས་པ་ལ་སོགས་པས་མཚོན་པའི་ས་གནས་དེ་གའི་དམངས་སྲོལ་འཚོ་བའི་མཛེས་རིས་ཤིག་གྲུབ་འདུག དམངས་སྲོལ་རིག་གནས་འདི་ཉིད་རིག་གནས་གང་དེའི་ཆེས་རྨང་གཞིར་གྱུར་བའི་མིག་མཐོང་ལག་ཟིན་གྱི་རིག་གནས་སྣང་ཚུལ་ཞིག་ཡིན་པའི་ཆ་ནས་འདི་ལྟར་གློག་བརྙན་བརྒྱུད་ནས་མཚོན་པར་དོན་སྙིང་བླ་ལྷག་ཏུ་ཆེ་སྟེ། དེས་ནི་ཕྱིའི་རྒྱལ་ཁབ་དང་མི་རིགས་ཁག་གིས་རང་རེའི་རིག་གནས་ལ་ངོས་འཛིན་བྱེད་པར་ཕན་པ་མ་ཟད། ནམ་ཉི་མ་ཞིག་ལ་རང་རེའི་དམངས་སྲོལ་འདི་དག་ཉམས་རྗེས་སུ། མ་འོངས་པའི་བུ་རབས་ཚ་རྒྱུད་དག་གིས་མཐོང་ལམ་དུ་ཡང་འགྱུར་ངེས་པ་སོགས་ཀྱི་ཆ་བལྟས་ནས་དེ་སྔའི་བོད་འབྲེལ་གློག་བརྙན་《ཧི་མ་ཡ་ལ་》དང་འདྲ་ཕྱོགས་ཤིག་ཡོད་པར་མཐོང༌།
མཇུག་མཐར། ཁོ་བོས་དེ་སྔ་གནས་གང་ཞིག་ནས་ཐོས་པའི་གློག་བརྙན་འདིའི་གདེངས་འཇོག་གནད་ལ་འཁེལ་བ་ཞིག་སྟེ། གློག་བརྙན་《ལྷིང་འཇགས་ཀྱི་མ་ཎི་རྡོ་འབུམ་》ནི་ད་ལྟའི་བོད་ཀྱི་སྤྱི་ཚོགས་མངོན་པར་མཚོན་པའི་མཉམ་སྒྲོག་རོལ་དབྱངས་ཤིག་དང་འདྲ་ཅེས་པའི་ཚིག་གིས་རྩོམ་ཐུང་འདི་རེ་ཞིག་མཚམས་འཇོག་པར་བྱ་ལ། སྐུ་ཞབས་པདྨ་ཚེ་བརྟན་ལགས་ཀྱིས་བོད་ནང་ལ་བོད་ཀྱི་གློག་བརྙན་རྣལ་མ་ཞིག་གི་སྲོལ་གཏོད་པར་གོང་བཀུར་དང་རྗེས་སུ་ཡི་རངས་བྱ་རྒྱུ་ཡིན་ལ། ཁོང་གི་གློག་བརྙན་བྱ་གཞག་ལ་སྔར་ལས་ལྷག་པའི་གྲུབ་འབྲས་ཐོབ་པའི་རེ་སྨོན་དང་སྦྲགས། སླད་ཕྱིན་བོད་ཡུལ་ས་ཕྱོགས་ཀུན་ཏུ་གློག་བརྙན་ལས་དོན་ལ་དགའ་མོས་ཡོད་མཁན་མང་ཙམ་འབྱུང་རྒྱུ་དང༌། བོད་བྱིངས་ཀྱིས་ཀྱང་གློག་བརྙན་ཞེས་པའི་སྒྱུ་རྩལ་རྣམ་པ་གསར་པ་འདིར་ངོས་འཛིན་ཡང་དག་ཤིག་ཐོབ་ནས་དེར་རོལ་མྱོང་གི་བློ་སྦྱོང་མཐོ་ནས་མཐོར་རུ་འཕགས་པའི་སྨོན་འདུན་ཞུས་པའོ། །
དཔྱད་མཆན་ཡོད།