བོད་རིགས་འཁྲབ་སྟོན་པ་བསོད་ནམས་ཉི་མ།

བོད་རིགས་འཁྲབ་སྟོན་པ་བསོད་ནམས་ཉི་མ།

མཁའ་སྤྱོད་དབང་མོས་བྲིས་ཤིང་པར་མཁོ་འདོན་བྱས།

22222.jpg

དང་པོ། ཐོག་མར་གློག་བརྙན་གྱི་ལམ་ཁར་ཞུགས་པའི་སྐོར་དང་དེའི་བརྒྱུད་རིམ།

            བསོད་ནམས་ཉི་མ་ནི་སྤྱི་ལོ1985ལོར་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་རྟའུ་རྫོང་དུ་སྐྱེས་ཤིང་། ཁོང་ཉིད་ལོ་བཅུ་བདུན་ལ་སོན་རྗེས་ནས་གླུ་གར་ཚོགས་པ་ཞིག་ཏུ་ཞབས་བྲོ་འཁྲབ་མཁན་བྱས། དེ་ནས་སྟེང་དབང་གི་གོ་སྐབས་ཤིག་གིས་ཁོང་ཉིད་སྐབས་དེར་ཆ་རྒྱུས་དེ་ཙམ་མེད་པའི་གློག་བརྙན་འཁྲབ་སྟོན་པའི་ལས་སུ་ཞུགས་འགོ་བརྩམས། སྤྱི་ལོ2006ལོར། ཁོང་གི་གློག་བརྙན་འཁྲབ་ཐེངས་ཐོག་མ་སྟེ།  «ཧི་མ་ལ་ཡའི་རྒྱལ་སྲས»ཞེས་པའི་འཁྲབ་སྟོན་ནང་ཞུགས་ཤིང་། གློག་བརྙན་དེའི་ནང་གི་མི་སྣ་སྟེ། གཞོན་དུས་ཀྱི་ཁུ་ལོ་ལང་འཁྲབ་སྟོན་བྱས་ཡོད།

         དེ་ཡང་བསོད་ནམས་ཉི་མས་སྔ་རྗེས་སུ་གློག་བརྙན«གྱེས་བྲལ་གྱི་གདུང་བ»དང«གཡང་མདའ།» «གངས་དཀར་རི་བོ།» «གངས་རིན་པོ་ཆེ།» «རྒྱུད་སྐུད་སྟེང་གི་རྣམ་ཤེས།» «ལྷ་མོ་དང་སྐལ་བྷེ»སོགས་ཕུལ་བྱུང་གི་རིག་གནས་སྒྱུ་རྩལ་མཚོན་པའི་གློག་བརྙན་བརྩམས་ཆོས་ཁག་གཅིག་འཁྲབ་སྟོན་བྱས་ཡོད་པ་དང་། དེ་དག་བརྒྱུད་ཁོང་གི་གློག་བརྙན་འཁྲབ་སྟོན་གྱི་འཁྲབ་རྩལ་ཡག་པོ་མངོན་པར་བྱས་ཡོད་པར་མ་ཟད། འཁྲབ་སྟོན་ལ་འཁྲབ་ཁྲིད་པའི་ཁས་ལེན་དང་ལྟད་མོ་བའི་དགའ་བསུ་ཐོབ་ཡོད།

          སྤྱི་ལོ2014ལོར་ཁོང་གིས་པདྨ་ཚེ་བརྟན་གྱི་གློག་བརྙན«གཡང་མདའ»ཞེས་པའི་ནང་གི་མདའ་པ་ཉི་མ་འཁྲབ་སྟོན་བྱས་པ་དང་། གློག་བརྙན་དེར་བརྟེན་བསོད་ནམས་ཉི་མར་ཧྲང་ཧའེ་རྒྱལ་སྤྱིའི་གློག་བརྙན་དུས་ཆེན་སྐབས17པའི་ཐོག་སྐྱེས་པའི་འཁྲབ་སྟོན་པ་ཡག་ཤོས་ཀྱི་མིང་འདོན་བྱ་དགའ་ཐོབ། དེ་ནས«གངས་དཀར་རི་བོ»ཞེས་པའི་གློག་བརྙན་འཁྲབ་སྟོན་ནང་ཞུགས་པས། གློག་བརྙན་དེར་སྤྱི་ལོ2016ལོར་ཨ་རིའི་སྐབས13པའི་འཛམ་གླིང་མི་རིགས་གློག་བརྙན་དུས་སྟོན་སྟེང་ཕུལ་བྱུང་གཏམ་རྒྱུད་གློག་བརྙན་གྱི་གཟེངས་རྟགས་ཐོབ་པ་དང་། གཞན་ཡང་སྤྱི་ལོ2016ལོར་ཀྲང་ཡང་གིས་འཁྲབ་ཁྲིད་བྱས་པའི་དོན་བརྗོད་གློག་བརྙན«གངས་རིན་པོ་ཆེ»ཡི་མི་སྣ་གཙོ་བོ་ཉི་མ་འཁྲབ་སྟོན་བྱས། གློག་བརྙན་དེར་སྐབས་བདུན་པའི་ཀྲུང་གོའི་གློག་བརྙན་འཁྲབ་ཁྲིད་པའི་མཐུན་ཚོགས་ཀྱི་ལོ་འཁོར་མོའི་ཞིབ་དཔྱད་གྲོས་ཚོགས་ཐོག་དམིགས་བསལ་གྱི་གཟེངས་བསྟོད་བྱ་དགའ་ཐོབ།

    སྤྱི་ལོ2018ལོར། བོད་ཀྱི་གློག་བརྙན་འཁྲབ་ཁྲིད་པ་ཟོན་ཐར་རྒྱལ་གྱི་གློག་བརྙན«ལྷ་མོ་དང་སྐལ་བྷེ»ཞེས་པ་དེའི་ནང་དུ་མི་སྣ་གཙོ་བོ་སྐལ་བྷེ་འཁྲབ་སྟོན་བྱས་ཡོད་པ་དང་། གློག་བརྙན་དེར་སྐབས14པའི་ཞང་ཀང་ཡ་གླིང་གློག་བརྙན་མ་འཇོག་ལྷན་ཚོགས(HAF)ཀྱི་མཐའ་མའི་བཟོ་སྐྲུན་གཟེངས་རྟགས་སོགས་ཀྱི་བྱ་དགའ་ཐོབ་ཡོད།

微信图片_20210713173134.jpg

གཉིས་པ། ཤོམ་འགྲོའི་ལམ་ལ་ཞུགས་པའི་སྐོར།

         བསོད་ནམས་ཉི་མ་ནི་གློག་བརྙན་འཁྲབ་སྟོན་ཐད་བྱང་ཆ་ལྡན་པར་མ་ཟད། ཕྱིའི་རྣམ་པ་རྫིག་པོ་ཡོད་པས་ཤོམ་འགྲོའི་ཐད་ལའང་གྲུབ་འབྲས་གཟེངས་སུ་ཐོན་པ་ཐོབ་ཡོད།

        དེ་རྗེས་ཁོང་ཉིད་ཕ་ཡུལ་དང་ཁ་བྲལ་ཏེ་ཧྲང་ཧའེ་གྲོང་ཁྱེར་ལ་ཕྱིན་ཏེ། ཤོམ་འགྲོ་དང་གློག་བརྙན་འཁྲབ་སྟོན་སོགས་སློབ་སྦྱོང་བྱས་པ་དང་། དེའི་རིང་དཀའ་སྡུག་མང་པོ་འཕྲད་པ་ནི་བརྗོད་མི་དགོས་པ་ཞིག་རེད། དེ་ཡང་སྤྱི་ལོ2010ལོར། ཁོང་ཉིད་ཧྲང་ཧའེ་ཟློས་གར་སློབ་གླིང་དུ་ཕྱིན་ནས་ལོ་བཞིའི་རིང་གི་གློག་བརྙན་འཁྲབ་སྟོན་སློབ་སྦྱོང་བྱེད་འགོ་ཚུགས། དེ་ནས་ཁོང་སྒྱུ་རྩལ་ལམ་བུའི་ཐོག་དངོས་སུ་ཞུགས་པ་དང་། ད་ལྟ་ཁོང་ཉིད་བོད་ཁུལ་ཡོངས་ལ་མིང་དུ་གྲགས་པའི་ན་གཞོན་འཁྲབ་སྟོན་པ་ཞིག་ཏུ་གྱུར་ཡོད།

微信图片_20210713173140.jpg

གསུམ། སྒྱུ་རྩལ་གྱི་ལས་འདིར་བཅངས་པའི་དུང་ཞེན་དང་ན་གཞོན་ཚོར་བཤད་འདོད་པའི་སྐད་ཆ་ཁག་ཅིག

          བསོད་ནམས་ཉི་མ་ནི་སྙིང་ཁོང་རུས་པའི་གཏིང་ནས་སྒྱུ་རྩལ་ལ་དགའ་ཞེན་ཆེ་བ་དང་། དེ་བས་ཀྱང་གློག་བརྙན་སྒྱུ་རྩལ་གྱི་ལམ་བུའི་ཐོག་རང་ཉིད་ཀྱི་ཕུགས་འདུན་འཚོལ་སྙེག་བྱེད་བཞིན་པའི་བོད་ཀྱི་ན་གཞོན་སྒྱུ་རྩལ་པ་ཞིག་ཡིན་ཞིང་། ཁོང་གི་སྒྱུ་རྩལ་ཐད་ཀྱི་ཐུན་མིན་གྱི་ཉམས་ལེན་དང་བསམ་པའི་ཁྱེར་སོ། དེ་བཞིན་དེའི་དཀའ་སྤྱད་སྡུག་རུས་ཀྱི་སྙིང་སྟོབས་བཅས་ཀྱིས་གཞོན་སྐྱེས་དེ་བས་མང་བོར་ཤུགས་རྐྱེན་ཐེབས་བཞིན་ཡོད་པ་རེད།

           ཁོང་གིས་གློག་བརྙན་ལ་དགའ་བའི་ན་གཞོན་ཚོར། གཅིག་ནས་རང་ཉིད་ཆུང་དུས་འཚར་ལོངས་བྱུང་སའི་ཁོར་ཡུག་དེས་ད་ལྟའི་སྒྱུ་རྩལ་གྱི་ལམ་བུར་ཐད་ཀར་ཤུགས་རྐྱེན་ངེས་ཅན་ཞིག་ཐེབས་སྲིད་པས། གློག་བརྙན་གྱི་ལས་རིགས་འདིར་དགའ་བའི་ན་གཞོན་ཚོས་སོ་སོའི་འཚོ་བའི་རྣམ་པ་དེ་གློག་བརྙན་ཁྲོད་མངོན་རྒྱུ་དེ་གལ་འགངས་ཆེན་པོ་རེད། གཉིས་ནས་གློག་བརྙན་འཁྲབ་སྟོན་གྱིས་ང་ལ་མི་སྣའི་གཤིས་ཀ་སྣ་ཚོགས་བཞེངས་སྐྲུན་བྱ་བའི་གོ་སྐབས་སྟེར་བར་མ་ཟད། མི་ཚེའི་མྱོང་ཚོར་མི་འདྲ་བ་མང་པོ་དང་། དེ་དག་གི་དགའ་སྐྱོ་ཆགས་སྡང་སོགས་ཀྱི་འཚོ་བའི་བྲོ་བ་གང་མང་ཞིག་ཉམས་སུ་མྱོང་བའི་གོ་སྐབས་སྟེར་བས། གློག་བརྙན་ལ་དགའ་པོ་ཡོད་པའི་ཁར་ཆེད་ལས་ལ་འབད་འབུངས་བྱ་དགོས། གློག་བརྙན་འཁྲབ་མཁན་ཞིག་ལ་མཚོན་ན་འཁྲབ་བྱའི་གློག་བརྙན་དེའི་རིག་གནས་ཀྱི་རྒྱབ་ལྗོངས་དང་འཚོ་བའི་གོམས་གཤིས་སོགས་ལ་རྒྱུས་མངའ་མཐར་ཕྱིན་པ་ལོན་དགོས།

       གསུམ་ནས་སྤྱིར་གློག་བརྙན་བརྩམས་ཆོས་ནང་གི་མི་སྣའི་གཤིས་ཀ་སོགས་ཐད་ཀྱི་རྣམ་པ་དེ་འཁྲབ་ཁྲིད་པ་དང་འཁྲབ་གཞུང་རྩོམ་པ་པོ། དེ་མ་ཟད་ལྟད་མོ་བ་བཅས་ཀྱི་འདོད་བློ་དང་མཐུན་པ་ཞིག་མངོན་མ་ཐུབ་ཚེ། དེ་ནི་བློ་ཕམ་སྐྱེ་བ་ཞིག་ཡིན་པས། གློག་བརྙན་གྱི་ལས་རིགས་འདིར་ཞུགས་ཡོད་པའི་ན་གཞོན་རྣམས་ནས་ངེས་པར་དུ་འཁྲབ་རྩལ་བྱང་ཆུབ་པ་དགོས་པས་དེའི་ཐད་འབད་བརྩོན་བྱ་དགོས་ཞེས་གླེང་། ཁོང་གིས་ད་ཐེངས་ཀྱི་བཅར་འདྲི་བརྒྱུད་རང་ཉིད་ཀྱི་སྒྱུ་རྩལམ་ལམ་བུའི་མྱོང་བ་དངོས་སུ་མཉམ་སྤྱོད་བྱས་པ་དེས་གློག་བརྙན་ལས་རིགས་ལ་དགའ་ཞིང་ལས་རིགས་དེར་འཇུག་སྤྲོ་བའི་གྲོགས་པོ་རྣམས་ལ་ཕན་ཐོགས་ཅུང་ཟད་ཡོང་བའི་རེ་བ་འཆང་བཞིན་ཡོད།

  «གངས་ལྗོངས་ཉི་གཞོན»ཞེས་པའི་དུས་དེབ2021ལོའི་འདོན་ཐེངས་

གཉིས་པའི་ཁ་བ་རི་བའི་བུ་རྒྱུད་ཅེས་པའི་ལེ་ཚན་ལས་བཏུས།

33333.jpg

  • ཟུར་བཀོད།

              རང་ཉིད་ཀྱི་ཉི་མ་བཟོ། བསོད་ནམས་ཉི་མ། http://www.filmtbt.com/people/actor/2021-07-13/1154.html

དཔྱད་མཆན་ཡོད།